Karl Wessels: "Sunndagmorgen"

Sunndagmorgen.
Von Karl Wessels, Kirchhellen

Sunndag, Sunndag es vandage,
Sunndag es un Fierdag;
Kiel un Holschen daut seck resten
Van den schwoaren Werkeldag.

Sunndagsklocken fangt ant biewen,
Raupt sau freuh un fierlick,
Raupt un raupt düert ganße Kärspel.
Höat gitt, wat sei freiet sick?

Grote Lü un kleine Kinner
Kommt van alle Sieten 'ran,
Sunndagskleder hätt seu alle,
Blankgewickste Schäukes an.

Blank det Oge, blank det Hadde,
Goaht seu ehren frommen Gank,
Goaht harin in Gottes Kärken,
Seggt do ehren Härgott Dank.